පන්සල් වත්තේ කොලු ගැටයින්ගේ විසේ
දකිනා විටදී පොඩි සාධුගේ හිත ගැස්සේ
නැටුමට ගැයුමට කෙළියට ආසා වයසේ
හැඬුවා සිහිව අම්මා හොඳටම රහසේ
ලොකු සාධුගේ බණ පද සිහි වී ආයේ
හිත නිවෙනවා පොඩි සාධුගේ කෙළි වයසේ
බුදු සාධුගේ රූපය යට පිදු මල් අහුරේ
හිත පිරෙනවා පොඩි සාධුගේ මල් සුවඳේ
කහ සිවුරේ කහ පාටට නිවන හැඩයි
වැලි මළුවේ වැලි ගානට සසර දිගයි
බෝ කොළයේ සිලි සිලියට සවන පිනෙයි
සංසාරයේ නැවතුම් පළ මහණ දමයි
