Wednesday, May 30, 2012

වියපත් දෑස

තනිකඩ පැල අඳුරුයි
කුරහන් යාය ම පැසී ගොසින්
කාලය අබියස පුරන් වෙලා

එදා ලියැදි දිග
ගොයම් සුවඳ විඳ
කුරහන් මල් නෙළුවා
මතකයි තවමත්
මේ දෑසට වියපත්

එදා අහස පිරි
තරු කැන් මැද
පුන්සඳ වන් මැණිකා
මතකයි තවමත්
මේ දෑසට වියපත්

Monday, May 28, 2012

නික්ම යාම

‘‘ඔයාට මාව
එපා වෙච්ච දවසට
මාව දාලා යන්න”

ඒත්
අපේ ආදරේ
හැමදාම වගේ
ඔයා හිටියේ
මට වඩා
පියවරක් හරි
පිටිපස්සෙන්

Friday, May 25, 2012

කළු ලෑල්ල

ටියුෂන් පන්තියේ
හැම අහුමුල්ලක ම
කොල්ලො කෙල්ලො
උන් උන්ගෙ වැඩ
උන් උන්ගෙ කථා
සර් ආවා විතරයි
පන්තිය ම හ්ම්...

ඒත් අපි දෙන්නා විතරක්
තවමත්
කළු ලෑල්ල දිහා බලාගෙන ම
අකුරු අහුලනවා
වචන ගලපනවා

Tuesday, May 22, 2012

කාලෙකින් හමුවීම

හිත හිඳියි අවදියෙන්
ඔබ එතැයි අලුයමින්
නෙත හිඳියි මඟ බලන්
හමු වෙතැයි කාලෙකින්

තොල් සැලෙයි සරතැසින්
මල් පිපෙයි අත ළඟින්
සිල් බි‍දෙයි සිහිනයෙන්
නුඹ එබෙයි මදහසින්

නෙත් පියෙයි නිදිමතින්
සඳ නොයයි හිත ළඟින්
හිත හිඳියි පාළුවෙන්
ඔබ නැතැයි කාලෙකින්

Monday, May 21, 2012

සැඟවී සැඟවී

සැඟවී සැඟවී සඳ ඈත ගනඳුරක
තනිවී තනිවී මා මෑත පැල්පතක

හමුවී හමුවී සිහිනෙන් සිහිනෙක
ඇළලී ඇළලී දෙතොලක් දෙතොලක
දැවටී දැවටී සුසුමක් සුසුමක
සැනහී සැනහී මොහොතක් මොහොතක

සමුදී සමුදී හදකින් හදකට
ගොළුවී ගොළුවී තෙපුලක් තෙපුලක
නැවතී නැවතී දෙනෙතක් දෙනෙතක
සිරවී සිරවී කඳුළක් කඳුළක

Monday, May 14, 2012

වාමාංශික ප්‍රේමය

අපි කථා කළා
දහසක් දේ
මාක්ස්වාදය ගැන
ලෙනින් ට්‍රොට්ස්කි ගැන
පන්ති සටන ගැන
ධනපතියගේ සූරාකෑම ගැන

ඒ අතර
අපි ආදරේ කළා
අපේ ඇස්වලින්

අපේ ජීවිත
අපි කැප කළා
විප්ලවය වෙනුවෙන්
නො මියෙන ප්‍රේමයක්
හදවතේ හිර කර ගෙන ම

Friday, May 11, 2012

සලෙළු තොල්පත

නුරා තැවරී
සිහින් දිගැසී
සුපෙම් මදහසින්
හැඟුම් උමතු වන්නේ

පවස නොසෑහී
දුහුල ලිහී
සලෙළු තොල් පතින්
හසුන් තෙමී යන්නේ

කුසුම වැතිරී
මෙවුල ලිහී
සිනිඳු පෙති මතින්
මධුමි මුදා ලන්නේ

Thursday, May 10, 2012

පිපාසය

ඇගේ
ප්‍රථම චුම්භනයෙන්
මා ලද
පිපාසය

  ව
     ම
        ත්
නො සිඳුණු එකකි

Wednesday, May 9, 2012

කෝපි කෝප්පය

අපි දෙන්නා
එකට
බොන්න ගත්ත
කෝපි කෝප්පේ
දැන්
හොඳටෝ ම නිවිලා

Tuesday, May 1, 2012

තෙමංසල

අප තිදෙන
තනි තනිව
ගමන් කළ
මේ මාවතේ
අවසන
තෙමංසලකි
ඔබ දෙදෙන
එහි ගිමන් හැර එන්න