Thursday, April 24, 2014

සිනමාහල

අකුණක් ගැසුවා
සිනමාහලට ඉහළ
අහස වෙත
බියෙන් තැති ගත් යුවළ
උනුන් තර ව වැළඳගත්තා
මල් වැස්සක්
හීනියට ඇද හැලුණා
සීතල ද කැටිකොට

කෙටි පණිවිඩයක්

ඉඳහිට
ලැබෙන
කෙටි
පණිවිඩයක්
ඇගේ
ආදරය

තුරුළ

තුරු වදුල
මට හිමි නැත
එහෙත් එහි පිපෙන
මල්පොදි විඳගමි

නිල් අහස
මට හිමි නැත
එහෙත් එහි දිලෙන
තරුරැස විඳගමි

නුඹේ තුරුළ
මට හිමි නැත
එහෙත් එහි නිදන
සිහිනය විඳගමි

යශෝධරා

යශෝධරා
මා සදාදර
ප්‍රියම්බිකා
කන්ථක ළය පැළී මියැදුණේ
තිරශ්චීන ව උපන් බැව්නි
එහෙත් පියබඳ නුඹ
ජීවිතාබෝධය ලද ඇත තරමක
සත්තය
සමුගන්න පෙර මොහොතකට
පවසන්න තිබුණා නුඹ හට
එහෙත් එ දවස
අහුරන්න ඉඩ තිබිණ
මා යන කටුක මඟ
ගැහැනියකගේ කඳුළ අබියස
මොළොක් වනු ඇත
පිරිමි සිත
ඉදින්
තිර කරගතිමි හදවත
අතහැර ගියෙමි ගිහිගෙය
රැගෙන ආවෙමි ඔසුපැන
බවදුක නිවමි සතවග
නුඹත් මා කැටුව
සත්‍ය සොයා ආවෙමු
මෙතෙක් කල
ඉතින් අප දුටු හීනය
සැබෑ වී ඇත
පෙරුම් පිරු ලෙස
ප්‍රේමය නම් මෙයැ යි
එහි උතුම් බව
යශෝධරා නුඹ
කියා දුන්නා නො වැ

Sunday, April 20, 2014

විසල් ගසක්

කලකට ඉහත
විසල් ගසක් ව
නුඹ
හිඳින්නට ඇත

සුවඳැති
මල් පිරිවරා
රස ඇති
ඵලවැල දරා

නෙතට
හරිත පැහැ
අඳුනක් ව
ලොවට
සෙවන දෙන
නිවසක් ව

අතු ඉති
බිඳී ගොස්
කොළ පත්
හැළී ගොස්
අක් මුල්
සිඳී ගොස් ය
අද

කලකට ඉහත
විසල් ගසක් ව
නුඹ
හිඳින්නට ඇත

අ සමාන

එකෙක්
මාළිගයේ
වහලය
පිළිසකර කරද්දි
තවකෙක්
කටුමැටි බිත්ති මත
පොල්අතු
සෙවිලි කරයි

වලව්ව

ඉස්කෝලේ
විභාගයෙන්
පාස් වෙච්ච දවසේ
වලව්වේ
හාමු මහත්තයා
අහම්බයෙන් වගේ
අපේ ගෙට ගොඩවුණේ

හාමු මහත්තයට කියන්න
අපේ කෙළී
විභාගයෙන් පාස් වෙලා නො වැ

අපූරු යි නො වැ
යවහං ඒකි ව
නගරේ ඉස්කෝලෙට
ඒකී පින්වන්ත යි බං

කොයින් ද හාමු
අපට කාසි

ඒකට කාරි නැහැ
කෙළීට
මං උදව් කොරන්නම්
ඒකි දක්ෂ යි බං

අනේ
හාමු මහත්තයට
බුදු බව අත් වෙනවා

ටික දොහකට පස්සෙ
වලව්වේ
හාමු මහත්තයා
පණිවිඩයක්
එවලා තිබ්බා
අම්මා අතේ
වලව්වට ඇවිත් යන්ට
කියලා
නගරේ ඉස්කෝලෙට
යන එක ගැන
කථා කොරන්ට

මාත් හනිකට
අම්මාත් කැටුව
වලව්වට ගෑටුවේ
නගරේ ඉස්කෝලෙට
යන්ට තිබ්බ
පෙරැත්ත හින්දා

සිරිවතී
උඹ පලයන්
ගෙදර වැඩපළත් ඇති නේ
කෙළීත් එක්ක
මං කථා කොර ගන්නම්
නගරේ ඉස්කෝලෙ ගැන
ඒකි දැන උගත් බං

එහෙම යි හාමු

.
.
.

වලව්වට ගිහින් ආපු
දවසෙ ඉදන්
උඹ හරි අමුතු යි බං

හයිකු කවියක්

වචන කිහිපයක්
ගැඹුරු අර්ථයක්
හයිකු කවියක්
ආදරේ

Saturday, April 12, 2014

එක රාත්‍රියක්

එක ම
එක රාත්‍රියකට
පමණක්
ඉසිඹුලන්නට
මම නුඹ වෙතට
ආවෙමි

නුරාවෙන්
මාත්තු කොට
දෙතොලත තවළ
රමණයේ මකරන්ද
මා මත් කළ තරම්

එක ම
එක රාත්‍රියකට
පමණක්

නිදිවරන දෑස

විඳවනා
හැඟුමන්
ගිලිහෙනා
කඳුළැල්

නිදිවරන දෑසෙන් උහුලමි
කවි ලියන දෑතෙන් පිසලමි

Friday, April 11, 2014

හිමිකම

වන්නි වන පෙතේ
විහඟ සුමිතුරේ
තල් අතු පතර හිඳන්
ගයන ගීතයේ
අරුත කුමක් දෝ

වන්නි වන පෙතට
හිමිකම නුඹට ඕනි ද
තුංග ගිරි කුළට
සමවන පැතුම ඒක ද
නැතිනම් එක ම කොදෙව්වක
සාමයේ ගීය ගයමු දෝ

නින්ද නැති රැයට
බිහිසුණු සිහින ගෙනෙමු ද
යුද්ද වැද බිමට
රත්වුණු රුහිරු හළමු ද
නැතිනම් එක ම කොදෙව්වක
සාමයේ ගීය ගයමු දෝ

Friday, April 4, 2014

ස්වප්නය

ඈ ව
එ රාත්‍රියෙ
මට මුණගැසුණා

හාදු වැස්සක්
රාග සිහිලක්
සුන්දර
ස්වප්නයක් ලෙස

පාන්දර
අරුණෝදයේ
මට හැඟුණා

පිනි බිඳුවක්
උණු කඳුළක්
ජීවිතය
මායාවක් බව

Wednesday, April 2, 2014

බේරේ වැව

එ දවස නුඹට මතක ද
බේරේ වැව පිස හමන සිසිලස
ඉඳ හිට ඇහෙන
කාක් රෑන්වල කිචි බිචිය
එක එක සෙවනැලි ඇන්ද
කොට්ටං  තුරු සෙවන
ග්‍රීෂ්මෙන් මිදෙන්න
වැව් පතුළෙ කිමිදෙන දියකාවුන්
ඈතට  හරි අපූරුවට පෙනෙන
වැව් මැද්දෙ සීමා මාලකේ
සිමෙන්ති බංකුවක් උඩ
අත්වැල් පටල ගත්ත
පෙම් යුවළ
එ දවස නුඹට මතක ද

Tuesday, April 1, 2014

අන්ධකාරය

මා
වඩාත් බිය
අන්ධකාරයට
නො ව
කණාමැදිරි
එළියට ය